ಸಿರಿವಂತನಾಗಲ್ಕೆ ಅರಿ ಮೊದಲು ಸಿರಿಯರ್ಥ
ಸಿರಿಯೆಂದೊಡೇನು ಬಲು ಬಂಗಾರ ಧನವೆ ?
ಸಿರಿ ಕನಕಮಲ್ತು ಭೌತಿಕಮಂತುಮಲ್ತಲ್ತು
ಸಿರಿ ದುಡಿವ ಮನ ಕಾಣೊ ಜಾಣಮೂರ್ಖ//
‘ಸಿರಿ’ ಏನು ಹೀಗಂದರೆ !? ಧನ ಕನಕ ! ಆಸ್ತಿಪಾಸ್ತಿ ! ಒಡವೆ ವಸ್ತು ! ನಾವು ಇವುಗಳನ್ನೆಲ್ಲಾ ಸಿರಿ ಎನ್ನುತ್ತೇವೆ. ಅದರಲ್ಲೇನೂ ತಪ್ಪಿಲ್ಲ ಬಿಡಿ. ಇವುಗಳನ್ನು ಹೊಂದಿರುವವರನ್ನು ಸಿರಿವಂತರು ಎನ್ನುತ್ತೇವೆ. ಆದರೆ ಅಂತಹಾ ಸಿರಿವಂತರಲ್ಲೇ ಸಿರಿ ಸೇರಲು ಕಾರಣವೇನು !? ಸ್ವಲ್ಪ ಯೋಚಿಸಿ ! ಅದೇನೂ ತಾನಾಗೇ ಬಂದು ಸೇರಿರೋದಿಲ್ಲ. ಅದು ಅವರ ದುಡಿಮೆಯ ಫಲವಾಗಿರುತ್ತದೆ. ಅವರಲ್ಲಿ ಮೈಮುರಿದು ದುಡಿಯಬೇಕು ಎನ್ನುವ ಮನಸ್ಸಿದೆಯಲ್ಲಾ ಅದೇ ನಿಜವಾದ ಸಿರಿ ! ಆ ಮನಸ್ಸಿಲ್ಲದಿದ್ದರೆ ಈ ಭೌತಿಕವಾದ ಸಿರಿ ಸಿರಿವಂತರ ಬಳಿ ಸೇರುತ್ತಿತ್ತಾದರೂ ಹೇಗೆ !? ಆದ್ದರಿಂದ ಸ್ವಲ್ಪ ಸೂಕ್ಷ್ಮವಾಗಿ ಯೋಚಿಸೋಣ. ಭೌತಿಕವಾದದ್ದು ಸಂತೋಷ ನೀಡುತ್ತದೆ ಅಷ್ಟೆ. ಆದರೆ ಅದೇ ಸಿರಿಯಲ್ಲ. ಆದರೆ ಅದನ್ನು ಗಳಿಸಲು ಪ್ರೇರಕಶಕ್ತಿಯಾದ ಮನಸ್ಸಿದೆಯಲ್ಲಾ ಅದೇ ನಿಜವಾದ ಸಿರಿ ಎನ್ನುವುದೇ ಸರಿ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
