ನಿರ್ವಾಣ

ಮಣ್ಣಿನದೊ ಕಲ್ಲಿನದೊ
ಮೂರ್ತಿ ಎಂತಿರಲೇನು ?
ಮಳೆಯಾಗೆ ಮಣ್ಕರಗೆ
ಮಣ್ಣಲ್ಲಿ ಮಣ್ಣು !
ಕಾಲ ಸಲೆ ಕಲ್ಲಳಿವು
ದೆಂತ ವೈಚಿತ್ರ್ಯಮಿದು
ಆತ್ಮ ಭಕ್ತಿಯೆ ಚಿರವೊ
ಜಾಣಮೂರ್ಖ //

ಮೂರ್ತಿ ಪೂಜೆಯ ಮನಶ್ಶಾಸ್ತ್ರೀಯ ಹಿನ್ನೆಲೆಯನ್ನು ನಾವು ಬಲ್ಲೆವು. ಅದನ್ನು ಅಲ್ಲಗಳೆಯಲಾಗದು. ಆದರೆ ಸ್ವಲ್ಪ ವಸ್ತುನಿಷ್ಠವಾಗಿ ಚಿಂತಿಸೋಣ. ಪೂಜಿಸುವ ಮೂರ್ತಿ ಮಣ್ಣಿನದೋ, ಕಲ್ಲಿನದೋ ಎಂತಾದರೂ ಇರಲಿ. ಮನದ ಭಕ್ತಿ ಮುಖ್ಯವಷ್ಟೆ. ಮಳೆ ಜೋರಾಗಿ ಬಂದು ಮಣ್ಣ ಮೂರ್ತಿಯು ತೊಯ್ದರೆ ! ಮಣ್ಣು ಮಣ್ಣನ್ನೇ ಸೇರುತ್ತದೆ. ಮಣ್ಣಿನಿಂದ ಮೂಡಿದ ಭಾವ ಮಾತ್ರ ಶಾಶ್ವತವಾಗಿರುತ್ತದೆ ಅಲ್ಲವೆ !? ಕಲ್ಲಿನ ವಿಗ್ರಹವೇ ಆಗಲಿ ಕಾಲ ಕಳೆದಂತೆ ಕಲ್ಲೂ ಸಹ ಭಿನ್ನವಾಗುತ್ತದೆ. ಆಗ ಅದು ಕೇವಲ ಕಲ್ಲಷ್ಟೆ ! ಭಿನ್ನವಾದ ವಿಗ್ರಹಗಳನ್ನು ಪೂಜಿಸುವರೇನು !? ಎಲ್ಲವೂ ಅಳಿಯುವವು. ಆದರೆ ಆತ್ಮಭಕ್ತಿಯಂತೂ ಅಳಿಯದು. ಅದು ಆತ್ಮವಿರುವವರೆಗೂ ಚಿರವು ! ಶಾಶ್ವತವು ! ಈ ಸತ್ಯವನ್ನರಿವ ತಾಳ್ಮೆ ನಮ್ಮಲ್ಲಿ ಬರಬೇಕಿದೆಯಷ್ಟೆ. ಆತ್ಮಕ್ಕೆ ಅಳಿವೆಲ್ಲಿಯದು !? ಹರಿ ನಮ್ಮವ , ಹರ ನಿಮ್ಮವ ಎಂಬುದನ್ನು ಬದಿಗಿಟ್ಟು ಅಂತಹುದೊಂದು ಅಗಮ್ಯವೂ , ಅದಮ್ಯವೂ ಆದ ಚೈತನ್ಯಕ್ಕೆ ಮನದಲ್ಲೇ ಮಣಿದು ಶರಣಾಗಿ , ಒಂದಾಗಿಬಿಡಿ ಗೆಳೆಯರೇ ! ದೇವರಲ್ಲಿ ಭೇದವಾದರೂ ಏಕೆ !? ಮರಣದ ನಂತರದಲ್ಲಿ ಪಂಚಭೂತಗಳನ್ನು ಸೇರುವ ಈ ಶರೀರಕ್ಕೆ ಮರಣದ ಮುನ್ನವೇ ಆತ್ಮ ಮುಖೇನವಾಗಿ ಅಂತಹುದೊಂದು ಭಾವವನ್ನು ತಳೆದು ಸಂತೋಷಿಸುವುದಿದೆಯಲ್ಲಾ ! ಅದೆಂತಹಾ ಅದ್ಭುತ ಅನುಭವ ಗೊತ್ತೆ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)