ಆತ್ಮಸಾಕ್ಷಿ

ಜಂಭವಳಿದವ ಜಗವ
ಜಯಿಪನೆನುವಂತ ನುಡಿ
ಜಂಬವಳಿದರೆ ತುಳಿವ
ರೆಲ್ಲ ಕಲಿಯುಗದಿ !
ಪದವಿಗಳ ಪಡೆದು ಬರಿ
ಡಂಭ ಮೆರೆದೊಡೆ ಆಯ್ತೆ ?
ಆತ್ಮಸಾಕ್ಷಿಯ ಸಾವೊ
ಜಾಣಮೂರ್ಖ //

ಸರಳ ಜೀವನ ಉದಾತ್ತ ಚಿಂತನೆಯ ತತ್ತ್ವ ಇಂದು ವಿದ್ಯಾವಂತ ಸಮುದಾಯದಲ್ಲಿ ಯಾರಿಗೆ ಗೊತ್ತಿಲ್ಲ ಹೇಳಿ ? ಆದರೆ ವಿಪರ್ಯಾಸವೆಂದರೆ ಈ ಮಾತು ಸೈದ್ಧಾಂತಿಕವಾಗಿ ಬದುಕಿದೆ. ಅಳವಡಿಕೆಯ ದೃಷ್ಟಿಯಿಂದ ಸತ್ತಿದೆ ! ಸಾಯುತ್ತಿದೆ ಎಂದೇ ಹೇಳಬೇಕು. ವಾಸ್ತವದಲ್ಲಿ ಸರಳವಾಗಿ ಮತ್ತು ನ್ಯಾಯಸಮ್ಮತವಾಗಿ ನಡೆಯುವವನು ಎಲ್ಲರ ಟೀಕೆಗೆ ಗುರಿಯಾಗಬೇಕಲ್ಲದೇ ಜಗತ್ತು ಅವನನ್ನು ತುಂಬಾ ವಿಚಿತ್ರವಾಗಿ , ಒಬ್ಬ ಪ್ರತ್ಯೇಕವಾದಿಯಂತೆ ಪರಿಗಣಿಸುತ್ತಿರುವುದು ಒಂದು ದೊಡ್ಡ ದುರಂತ. ಮೌಲ್ಯಾದರ್ಶಗಳು ಸಿದ್ಧಾಂತಗಳಾಗಿ ಉಳಿದಿವೆಯಷ್ಟೆ. ಆಚರಣೆಯಲ್ಲಿ ಬರುತ್ತಿಲ್ಲ. ಪದವಿಗಳನ್ನು ಪಡೆದು , ಪ್ರತಿಯೊಂದನ್ನೂ ತಾತ್ತ್ವಿಕವಾಗಿ ಚಿಂತಿಸುವ ಗುಣವುಳ್ಳವರೇ ಗುಣವಿಹೀನ ಪಶುಗಳಂತೆ ವರ್ತಿಸಿ ತಮಗೆದುರಿಲ್ಲವೆಂಬಂತೆ ಮೆರೆದರೆ ಇದು ಆತ್ಮಸಾಕ್ಷಿಯ ಸಾವಲ್ಲದೇ ಮತ್ತೇನು !? ( ಕ್ಷಮಿಸಿ ನಾನು ಪಶುಗಳೆಂದುಬಿಟ್ಟೆ ! ಪಶುಗಳಲ್ಲಿ ಮಾನವೀಯತೆಯನ್ನು ಮೀರಿದ ಗುಣವಿರುವುದನ್ನು ಇಂದು ಗಮನಿಸುತ್ತಿದ್ದೇವೆ ! ಆದರೆ ಮಾನುಷ್ಯ ಮಾತ್ರ ಯಾಕೋ ಹೀಗಾಗಿಬಿಟ್ಟ !) ಏನು ಮಾಡುವುದು ! ಕಾಲಾಯ ತಸ್ಮೈ ನಮಃ ಎಂದು ಸುಮ್ಮನಿರುವುದೆ ? ಅದು ಮಾನವತೆಯಾಗುವುದಿಲ್ಲ. ನಾವು ಮೊದಲು ಮಾದರಿಯಾಗೋಣ. ತಿದ್ದಿಕೊಂಡರೆ ಸಂತೋಷ. ಇಲ್ಲದಿದ್ದರೆ ಬಿಡಿ ಅದ ಅವರಿಗೆ ಬಿಟ್ಟದ್ದು . ಇಂತು ಎಲ್ಲರೂ ತಮ್ಮನ್ನು ತಾವು ತಿದ್ದಿಕೊಂಡು ನಡೆದರೆ ಈ ಭುವಿ ರಾಮರಾಜ್ಯವಾದೀತು ! ಏನಂತೀರಿ ?!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)