*ಶ್ರೇಷ್ಠತ್ವದ ದಾರಿ*

ಸುಖದೊಳೊಂದಾಗುತಲಿ
ಕಷ್ಟದೊಳು ದೂರಾಗಿ
ನಿಷ್ಠನಂದದೊಳೊಪ್ಪೆ
ಶಿಷ್ಠನಾದೀಯೇಂ ?
ಸುಖದೊಳಿರದಿರಲೇನು?
ಕಷ್ಟದೊಳಗೊಂದಾಗು
ಶ್ರೇಷ್ಟತ್ವಕಿದೆ ದಾರಿ
ಜಾಣಮೂರ್ಖ //

ಓ, ಗೆಳೆಯಾ ! ಒಬ್ಬರ ಸುಖದಲ್ಲಿ ಒಂದಾಗಿರುವುದು ದೊಡ್ಡದಲ್ಲ, ಘನವೂ ಅಲ್ಲ. ಕಷ್ಟಕಾಲದಲ್ಲಿ ಜೊತೆಯಿರುವುದಿದೆಯಲ್ಲಾ ! ಅದು ನಿಜವಾದ ಘನತೆ. ಕಷ್ಟದಲ್ಲಿ ದೂರವಿದ್ದು , ಪಲಾಯನವಾದಿಯಾಗಿ ಆಮೇಲೆ ನಿಷ್ಠನ ರೀತಿ ಮಾತನಾಡುವುದು ತರವೇ ? ಇದನ್ನು ನಿಷ್ಠತೆ ಎನ್ನಲಾದೀತೆ ? ದುರಂತವೆಂದರೆ ಇಂದು ಜಗತ್ತಿನಲ್ಲಿ ಇಂತಹವರೇ ತುಂಬಿದ್ದಾರೆ. ಬರೀ ನಿಷ್ಠತೆಯ ಮುಖವಾಡಗಳೇ ಕಾಣುತ್ತಿವೆ. ಮುಖವಾಡ ಕಳಚಿದರೆ ಬಣ್ಣ ಬಯಲಾಗುತ್ತದೆ. ಹೀಗೆ ಮುಖವಾಡ ಹಾಕಿ ಬದುಕಿದರೆ ಲೌಕಿಕ ಬದುಕಿನಲ್ಲಿ ಕ್ಷಣಿಕವೂ , ಮಿಥ್ಯವೂ ಆದ ಬಣ್ಣ ಬಣ್ಣದ ಸಾಧನೆಗಳಾಗಬಹುದೇನೋ ! ಆದರೆ ಮರೆಯದಿರು, ಮೇಲೊಬ್ಬನಿದ್ದಾನೆ ! ಅವನೆಲ್ಲವನ್ನೂ ನೋಡುತ್ತಿದ್ದಾನೆ. ಸ್ವಾರ್ಥ ಬಿಡು. ಮರೆಯದಿರು ನಿನ್ನ ಹೆಜ್ಜೆಯ ಗುರುತುಗಳನ್ನು! ಹಣಸಂಪಾದನೆಯೊಂದೇ ಗುರಿಯಲ್ಲ. ನಿನ್ನವರ ಕಷ್ಟದೊಳಗೊಂದಾಗು ಇದೇ ಶ್ರೇಷ್ಠತ್ವದ ದಾರಿ. ಸುಖದಲ್ಲಿ ಭಾಗಿಯಾಗದಿದ್ದರೂ ಚಿಂತೆಯಿಲ್ಲ. ಕಷ್ಟಕಾಲದಲ್ಲಿ ನೆರವಿಗೆ ನಿಲ್ಲಬೇಕು. ಇದು ನಿಜವಾದ ಮಾನವಧರ್ಮ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)