ಸಲ್ಲದಾಟವ ತೊರೆಯೊ

ಕಲ್ಲ ಮೆಲ್ಲುವೆಯೇಕೆ ಕಲ್ಲು ಸಕ್ಕರೆಯಿಹುದು
ಮೆಲ್ಲು ಬಾರೆನ್ನುತಲಿ ಗುರುವು ತಾ ಕರೆಯೆ
ಇಲ್ಲ ಕಲ್ಲನೆ ಮೆಲ್ವೆನೆನುವ ಮೂರ್ಖನ ಪರಿಯ
ಸಲ್ಲದಾಟವ ತೊರೆಯೊ ಜಾಣಮೂರ್ಖ//

ಕಲ್ಲನ್ನೇಕೆ ತಿನ್ನುವಿರಿ ! ಬನ್ನಿ ನನ್ನ ಬಳಿ ಕಲ್ಲು ಸಕ್ಕರೆ ಇದೆ ಕೊಡುತ್ತೇನೆ. ತಿಂದು ಸವಿಯನ್ನು ಅನುಭವಿಸಿ ಸಿಹಿಯಾಗಿರಿ ಎಂದು ಸದ್ಗುರುವು ಕರೆಯುತ್ತಾನೆ. ಗುರುವಿನಲ್ಲಿ ನಂಬಿಕೆಯಿಡದ ನಾವು , ಇಲ್ಲ ! ನಾನು ಕಲ್ಲನ್ನೇ ತಿನ್ನುತ್ತೇನೆ, ಇದೇ ಚನ್ನಾಗಿದೆ ಎನುವ ಹುಂಬತನ ತೋರಿದರೆ ಗುರುವೇನು ಮಾಡುತ್ತಾರೆ ಹೇಳಿ !? ಸ್ನೇಹಿತರೇ , ಗುರುವು ಸದಾ ನಮ್ಮನ್ನು ಸರಿದಾರಿಯಲ್ಲಿ ನಡೆಸಲು ಮತ್ತು ದಡ ಸೇರಿಸಲು ಸುಂದರ ದಾರಿಗಳನ್ನು ತೋರಿಸುತ್ತಾನೆ. ಆದರೆ ನಮಗೆ ಬಯಸಿದುದು ತಕ್ಷಣವೇ ಸಿಕ್ಕಿಬಿಡಬೇಕು ! ಇದು ಹೇಗೆ ಸಾಧ್ಯ !? ನಮ್ಮ ಪ್ರಾರಬ್ಧಕರ್ಮಗಳು ಕಳೆಯಬೇಕಲ್ಲ ! ಇದು ಕಳೆಯಲು ಗುರುವಿನ ಗುಲಾಮನಾಗಬೇಕು ; ಅಲ್ಲಿಯ ವರೆಗೂ ದೊರೆಯದಯ್ಯಾ ಮುಕುತಿ ! ದಾಸವರೇಣ್ಯರುಗಳು ತಮ್ಮ ಕೀರ್ತನೆಗಳಲ್ಲಿ ಸಾರಿದುದು ಇದನ್ನೇ ! ಮುಖ್ಯ ನಂಬಿಕೆ ಬೇಕು ಅಷ್ಟೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)