ಹನನಮಾಯ್ತೈ ಭಾವ

ಕನಕ ಮುಕುಟಾಭರಣ ಪೀತಾಂಬರವ ಕೊಟ್ಟು
ಮನದೊಳಗೆ ಕೊಟ್ಟೆ ನಾನೆನಲೇನು ಬಂತು ?
ಅನಿಬರ್ಗೊ ದೇವಂಗೊ ಕೊಟ್ಟುದೇನಾರ್ಗೆ ಪೇಳ್ !
ಹನನಮಾಯ್ತೈ ಭಾವ ಜಾಣಮೂರ್ಖ//

ಇತ್ತೀಚೆಗೆ ಕೊಡುವಿಕೆ , ನೀಡುವಿಕೆಗಳು ಒಂದು ತರಹೆ ತೋರ್ಪಡಿಕೆಯಾಗಿಬಿಟ್ಟಿದೆ. ದೇವರಿಗೆ ಬಂಗಾರದ ಕಿರೀಟ ಕೊಟ್ಟೆ , ಪೀತಾಂಬರ ಕೊಟ್ಟೆ , ಇಲ್ಲಿ ಇಷ್ಟು ಜನಕ್ಕೆ ಊಟ ಹಾಕಿಸಿದೆ ! ಏನಾಶ್ಚರ್ಯ ಅಲ್ಲವೇ ? ಮನದೊಳಗೆ ನಾನು ಕೊಟ್ಟೆ ಎಂಬ ಭಾವ ಲೇಶಮಾತ್ರ ನುಸುಳಿದರೂ ಸಾಕು. ಏನು ಪ್ರಯೋಜನವಾಯ್ತು ? ಕೊಟ್ಟುದೇನಿದ್ದರೂ ನಿಷ್ಪ್ರಯೋಕವಾಯ್ತು. ಹೋಗಲಯ್ಯ , ಕೊಡಲು ನೀನಾರು ? ಕೊಟ್ಟುದಾದರೂ ಯಾರಿಗೆ ? ಜನರಿಗಾಗೋ ! ದೇವನಿಗಾಗೋ ?! ಕೊಟ್ಟುದಾಯಿತು ಬಿಡು ! ಮತ್ತೆ ನಾನೆಂಬ ಭಾವವೇಕೆ ? ಕೊಟ್ಟ ನೀನಾಗಲಿ, ಪಡೆದವರಾಗಲಿ, ಕೊಟ್ಟದೇನೇ ಆಗಿರಲಿ ಎಲ್ಲವೂ ಇಲ್ಲಿ ನೆಪಮಾತ್ರ. ಕೊಟ್ಟ ಭಾವವೇ ಮುಖ್ಯ ಕಣಯ್ಯ ಗೆಳೆಯ . ಭಗವಂತ ನೋಡೋದು ಅದನ್ನೇ. ನೀ ಕೊಟ್ಟೆ , ಅದನ್ನು ನಿನಗೇ ಕೊಟ್ಟೆ ! ಕೆರೆಯ ನೀರನು ಕೆರೆಗೆ ಚಲ್ಲಿದೆ ಅಷ್ಟೆ ಎಂಬ ಭಾವದಲ್ಲಿ ನೀಡಿದರೆ ಅದು ದೈವ ಚಿತ್ತಕ್ಕೆ ತುಂಬಾ ಪ್ರಿಯ. ಅಷ್ಟಕ್ಕೂ ನಾ ತಂದಿರುವುದಾದರೂ ಏನು ? ಕೊಂಡೊಯ್ಯೋದಾದರೂ ಏನು ? ಅಲ್ವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)