ಕುಂದೆಣಿಪ ಬಾವ ಬಿಡು

ಅಂದು ಗಜರಾಜ ತಾ ನೊಂದು ಕೂಗಲ್ಕೆ ಹರಿ
ಬಂದನೈ ಓಡೋಡಿ ಕರ ಪಿಡಿದು ಪೊರೆಯೆ !
ಇಂದು ಜಗ ಬೊಬ್ಬಿಡುತಲಿದೆ ಒಬ್ಬನಿಗು ಕಾಣ !
ಕುಂದೆಣಿಪ ಬಾವ ಬಿಡೊ ಜಾಣಮೂರ್ಖ //

ಗಜೇಂದ್ರ ಮೋಕ್ಷದ ಕಥೆ ಯಾರಿಗೆ ಗೊತ್ತಿಲ್ಲ ಹೇಳಿ ! ಮೊಸಳೆಯು ಆನೆಯ ಕಾಲನ್ನು ಹಿಡಿದು ಎಳೆವಾಗ ಅದು ನಾರಾಯಣಾ ಎಂದು ಆರ್ತನಾಗಿ ಕೂಗಿದುದೇ ತಡ ಗರುಡಗಮನನಾಗಿ ಬರುತ್ತಿದ್ದ ಶ್ರೀಹರಿ ತನ್ನ ಸುದರ್ಶನದಿಂದ ಮೊಸಳೆಯ ಕತ್ತನ್ನು ಕತ್ತರಿಸಿ ಭಕ್ತನನ್ನು ಕಾಪಾಡಿದ. ಗಜದ ಕೂಗೊಂದಕೆ ಓಡೋಡಿ ಬಂದ ದೇವ ! ಇಂದು ಜಗವೇ ಬೊಬ್ಬಿಡುತ್ತಿದೆ ! ಆದರೆ ಹರಿ ಬರುತ್ತಿಲ್ಲವಲ್ಲ ! ಸ್ನೇಹಿತರೇ, ಶ್ರೀಹರಿಯಂತೂ ಬಂದಾಗಿದೆ. ನೋಡುವ ಕಣ್ಣು , ಹೃದಯ ಬೇಕಾಗಿದೆ ಅಷ್ಟೆ. ಬದುಕನ್ನು ಸ್ವಲ್ಪ ಸೂಕ್ಚ್ಮವಾಗಿ ನೋಡಬೇಕಿದೆ ಅಷ್ಟೆ. ಹರಿಯು ಇದ್ದಾನೋ , ಇಲ್ಲವೋ ಎಂಬ ಸಂಶಯದ ಭಾವದಲ್ಲೇ ಇದ್ದರೆ ಸಿಗುವನೇ ಹರಿಯು ! ಕಾಣಲು ಸಾಧ್ಯವೇ ಆ ಭಗವಂತನನ್ನು. ಮೊದಲು ಈ ಗೊಂದಲವನ್ನು ಬಿಟ್ಟು ಹೃದಯದ ಕಣ್ಣಿನಿಂದ ನೋಡಿ. ಖಂಡಿತ ಕಂಡೇ ಕಾಣುತ್ತಾನೆ ! ನಂಬಿದವರಿಗೆ ಭಗವಂತ ಇದ್ದೇ ಇದ್ದಾನೆ. ನಂಬಿಕೆ ಬೇಕಷ್ಟೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)