ಮನದಹಮ ಕಳೆದು ಕರ್ಮವನೆಸಗು ಬಾಳಿನೊಳು
ನನದೆನದೆ ನಿನದೆನ್ನು ಸೇವೆ ಗುರಿಯಲ್ತೆ !?
ಚಣಚಣದ ಕರ್ಮ ದೇವನ ಪೂಜೆ ಭಾವದೊಳು
ಘನಭಾಗ್ಯವೆಂದು ಸಾರ್ ಜಾಣಮೂರ್ಖ //
ಓ ಗೆಳೆಯ , ಈ ಬದುಕಲ್ಲಿ ನಾನೆಂಬ ಅಹಂಕಾರವನ್ನು ಕಳೆಯಬೇಕಾದರೆ ಗೈವ ಪ್ರತಿಯೊಂದು ಕಾರ್ಯವೂ ನಿನ್ನದಯ್ಯಾ ಎಂಬ ಸಮರ್ಪಣಾ ಭಾವವಿರಲಿ !ನಿಸ್ವಾರ್ಥ ಸೇವೆ ಬಾಳಿನ ಗುರಿಯಾಗಿರಲಿ ! ಕ್ಷಣಕ್ಷಣದ ನಮ್ಮ ಕಾರ್ಯಗಳೆಲ್ಲವೂ ಭಗವದಾರಾಧನೆಯೆಂಬ ಭಾವದಲ್ಲೇ ನಡೆಯಲಿ ! ಇದು ನಮ್ಮ ಜೀವನದಲ್ಲಿ ಭಗವಂತನು ನೀಡಿರುವ ಭಾಗ್ಯ ಎಂಬ ಭಾವದಲ್ಲಿ ಕರ್ಮವೆಸಗಬೇಕು. ಇದರಿಂದ ಅಹಂಕಾರ ಮಮಕಾರಗಳು ಕಳೆದು ಮನಸ್ಸು ಪರಿಶುದ್ಧವಾಗುತ್ತದೆ. ಸಾಕ್ಷಾತ್ ಭಗವಂತನೇ ಕರ್ಮದಲ್ಲಿ ಮಗ್ನನಾಗಿದ್ದಾನೆಂದ ಮೇಲೆ ನಮ್ಮದ್ಯಾವ ಲೆಕ್ಕ !? ಅಂದ ಹಾಗೆ ಈ ಸೃಷ್ಟಿಯನ್ನು ಹಾಗೇ ಗಮನಿಸಿ ! ಒಂದು ಕ್ಷಣವೂ ಸುಮ್ಮನಿಲ್ಲ ! ಅಲ್ಲವೇ ! ಹಾಗೇ ನಾವೂ ಸಹ ಸದ್ಧರ್ಮ , ಸತ್ಕಾರ್ಯ , ಸಚ್ಚಿಂತನೆಗಳಲ್ಲಿ ಬದುಕನ್ನು ಸಾರ್ಥಕವಾಗಿ ಕಳೆಯಬೇಕು. ಅಲ್ಲವೇ ಗೆಳೆಯರೇ ?!
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
