ಆಕಾಶದಾಚೆ

ಜಗದಗಲ ಮುಗಿಲಗಲ ಮನದಗಲಕುಂ ಮೀರಿ
ಸೊಗಯಿಸುವ ಆಗಸದ ಆಚೆಗಿಹುದೇನು ?!
ಮಿಗೆ ಮೀರೆ ಕಣ್ಣೀರು ಅಳವಿಗೆಟುಕನೊ ದೈವ
ಸಿಗದಂತೆ ಸಿಗುವುದದೊ ಜಾಣಮೂರ್ಖ //

ನಮ್ಮ ನಿಮ್ಮಗಳ ಮನಸ್ಸಿಗೂ ಈ ಯೋಚನೆ ಒಂದಲ್ಲಾ ಒಂದು ಸಾರಿಯಾದರೂ ಬಂದೇ ಇರುತ್ತದೆ. ಆದರೆ ಉತ್ತರ ಸಿಗದೆ ಸುಮ್ಮನಾಗಿರುತ್ತೇವೆ ಅಷ್ಟೆ ! ಆ ಪ್ರಶ್ನೆ ಏನೆಂದರೆ ಆಕಾಶದಾಚೆಗೆ ಏನಿರಬಹುದು ಅಂತ ! ಚಿಕ್ಕ ವಯಸ್ಸಿನಲ್ಲಿ ಒಂದು ಕಲ್ಪನೆ ಇತ್ತು. ನಿಮಗೂ ಇದ್ದಿರಬಹುದು. ಆಕಾಶದ ಮೇಲೆ ಸ್ವರ್ಗ , ನರಕ ಎಲ್ಲವೂ ಇವೆ. ಸಕಲ ದೇವತೆಗಳೂ ಇರುತ್ತಾರೆ…. ಹೀಗೆ ಏನೇನೋ…. ಆದರೆ ಹೀಗೇ ಮನಸ್ಸು ಹಣ್ಣಾದ ಹಾಗೆ ಚಿಂತನೆಗಳೂ ಹಣ್ಣಾದವು ! ಆಕಾಶದ ಕಲ್ಪನೆಯಲ್ಲಿ ತನ್ಮಯರಾದಾಗ ಕಣ್ಣೀರು ಧಾರಾಕಾರವಾಗಿ ಬಂತು ! ನಮ್ಮ ಊಹೆಗೂ ಮೀರಿರುವ ಅನಂತ ವ್ಯಾಪ್ತಿಯನ್ನು ಹೊಂದಿರುವ ಪಂಚಭೂತಗಳಲ್ಲಿ ಒಂದಾದ ಆಕಾಶವನ್ನು ಗಮಿಸಲಾದೀತೆ !? ಅದು ಅಗಮ್ಯ ! ನಮ್ಮ ಸಾಮರ್ಥಕ್ಕೆ ನಿಲುಕದದು ! ಅದೇ ದೈವ. ಅದ್ಹೇಗೆ ಅಂದ್ರೆ ನೋಡಿ ನಮ್ಮ ಕೈಗೆ ಸಿಗುತ್ತೆ ! ಅನುಭವಕ್ಕೆ ಸಿಗುತ್ತೆ ! ಆದರೆ ಹಿಡಿಯೋಕಾಗಲ್ಲ. ಪಂಚಭೂತಗಳೆಲ್ಲವೂ ಅಷ್ಟೇ ಅಲ್ಲವೇ !? ಎಲ್ಲವೂ ಅನುಭವಕ್ಕೆ ಎಟುಕುತ್ತವೆ ಆದರೆ ಕೈಗೆ ಸಿಗವುದಿಲ್ಲ ! ಅಬ್ಬಾ ಇಂತಹಾ ದೈವ ವಿಸ್ಮಯಕ್ಕೊಮ್ಮೆ ಮನದಣಿಯೆ ಮಣಿದು ಜನ್ಮ ಸಾರ್ಥಕ ಮಾಡಿಕೊಳ್ಳೋಣವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)